"Tempesta a Canneto"

"Tempesta a Canneto" Tempesta a Canneto di Nello Raffaele A campana sunàva l’avi Maria n’te strati ‘un si vidìa na pirsuna, fascìa friddu, ‘nta lossa mu sintìa, ca chidda nun parìa notti di luna, Dda sira iò era tuttu n’duluratu, sucàtu stava e sempri arricugghiutu, sintìa ca Innaru era arrivatu e ca lu bieddu tempu avìa finutu. Na uardata ci desi a li puntazza, pirchì mi lu dsicíanu i me ossa, m’accurgìu però ch’era vunazza, e ca Ghiuozzu spicchiava ‘nta la fossa. ‘Nta stati mi curcava sempri notti, dda vota fu ‘nto liettu i prima sira, c’avìa i jammi debuli e stracuotti, ca nun valìa cchiù di menza lira. Mi dissi ‘nta la menti i cuosi i Diu, e dopu, ‘nta ná vóta m’assunnaiu, ma forsi fu a Madonna o Padre Piu si a menza notti ‘npuntu, mi svigghiaiu. Di maistru lampiáva a lu gricali, e u cielu sutta e lampi, era nu ‘nfiernu, u tiempu si mittìa sempri cchiù mali, ca si jucava avíssi fattu tiernu. U vientu cuminciava a rifuliari, ‘nto strittu friscàva cumu on trenu, scumazzava lu pilu di lu mari, sbattiennu o Munti Rosa senza frenu. Finiestri e puorti trimuliavanu, parìa ca c’era i fora cu i spincìa, e sempri cchiù i carni m’aggrizzavanu, uardannu ddu timpurali chi criscìa. ‘Nta nenti visti isàri i cavadduna ora a timpesta un’era cchiù luntana, si unu sarvava a varca, era furtuna, sutta a chiddu grecu e tramuntana. ‘Nta strata u primu cuorpu avìa trasutu, e l’autru nun lu fascìa cchiù a girari, s’avìa u muragghiuni accunsintutu e a lu terzu, finù di campàri. P’arriparari un puocu lu so nidu la genti s’intacciava li purtuna, Turi u discìa : “sta vota nun mi fidu” “forza carúsi, ca è tiempu c’on pirduna” ! U mari ‘un scircava cchiù pirmissu, parìa ca u paisi s’affucava, c’era cu si strincìa o Crucifissu, vidiennu ca la casa si sfasciava. Qurcunu i fora a vista sa gudìa, ma tanti piniavanu i duluri, uardannu li so cosi ca pirdìa, n’mienzu a ddu sfracelu di tirruri. Accuminciava a nasciri lu juornu, e nuddu segnu c’era i carmarìa, scidù dopu passatu lu menziuornu, e a sira ‘un sonò……l’avi Maria !

a cura di Peppe Paino