"Nostalgia"

"Nostalgia" Giovanni Giardina U sacciu ca divintaiu runguliusu e cacchi vota puru murrittusu, ma si m’arridduscíu ‘nta stu statu, sara’ pirchì rispulviru u passatu ! Già i carusu Diu mi cunnannó, l’unicu sustiegnu c’avía mu livó ‘un sapiennu poi c’avìa a fari, mi desi in canciu u donu di cantari . A musica fu cumu a droga mia u riestu era cumu son’esistía a ott’anni, cuminciaiu a cantári, a desci, m’imparaiu a sonári Unn’arrivava ió c’era armonía, e tanta , tanta musica e allegria, man manu chi criscía ió, criscía a passioni, ‘ nto stissu tiempu a vusci e a vocazioni Quantu emozioni chi pruváiu !. Quantu soddisfazioni chi mi passiaiu ! iu puru a Caltagironi ,fu pu festival della canzone, ed era pu titulu di campioni da Regioni. Cumu finù ? Aggiraiu cu titulu i campioni !. E ddu complessu cu l’amisci mia ! L’anni cchiu’ belli i tutta a vita mia! ma t’annu si sonáva veramenti, ancora ‘un avíanu nisciutu sti strumenti ‘N’finu a quannu campáva Vartuluzzu ancóra ma fidáva e scinnía o puzzu appena sintía sonári u mandolinu paría un vistitu ca mi cadía a pinninu. Basta co sintía sulu ‘n’tunári ca subitu mi fascía avanti pi cantári cu tutti ddi canzuni napulitani era capásci di fari nuttati sani. Ora ‘un si senti mancu un mandulinu senza du mastru , ‘un c’è cchiú fistinu, pari co puzzu fussi sempri a luttu , i quannu vinni a mancari Vartuluzzu. E ió, si prima avía sciatu di jttári ora, ‘unn’haiu mancu pi caminari, sientu a passioni ancora ca mi tenta, e a frevi m’anchiana subitu a quaranta . Purtroppu di n’artista, chistu resta, ‘nfilativielu tutti dintra a testa , prima campava di musica e allegrìa, ora …………sulu di nuda nostalgía !

a cura di Peppe Paino