"Spiranza pi sti figghi"

"Spiranza pi sti figghi" Spiranza pi sti figghi ! di Giovanni Giardina 2012 Oh patri mia, io’ ‘un ti dicu nenti tu mi mittisti o munnu e’ fu cuntenti, poi pi disgrazia o pi castiu i Diu, tu mi lassasti nicu e ti pirdi’u . Ricuordu havi’a finutu i puocu a uerra ma nuddu pinio’ a fami n’ta sta’ terra, cu schinu, cu zappuni, e chi zappuddi, ortaggi, ranu, e fila di rapuddi. A nonna mia chi ligna cuscinava c’un piattu di fasula m’ascialava, n’ta cascia si tini’a u pani caliatu prima vini’a vagnatu e poi cunzatu. Quannu fasci’a a pasta chi pastiddi, da cuntintizza io’ vidi’a li stiddi, e finu c’on si vriugnavanu i pignati, sempri patati e vruocculi affucati . Sutta e travagghi eramu struduti ma in canciu si scoppiava di saluti, pi stari m’piedi e rinfurzari u schinu, pani caliatu e a schicciuledda e vinu. ‘ddi tiempi oramai fuoru scurdati, i figghi nostri su tutti viziati ‘un manca nenti, sempri pranzi fini, apposta i spitali sunnu sempri chini. N’ta ricchia tutti cu telefoninu passianu avanti e arriedu a culu chinu, su tutti strapurtati di la scienza, ‘un fuoru n’zignati n’ta malipatienza. Ora ca i tiempi nuostri su passatii, i viecchi gia’ sbattimu ca saluti, u desideriu e’ moriri cuntenti, spirannu ca a sti figghi ‘un manca nenti ! Lipari-07-02-2012-

a cura di Peppe Paino