"A me matri"

Giovanni Giardina ci propone la poesia "A me matri " di Giovanni Farruggio : Tu mi criscisti , mi mannasti a scola poi mi mittisti l’ali e mi discisti vola. E iò vulàiu ‘ntra paisi strani, senza pinzàri ca ti lassàiu ‘nte peni. Partìu…….. ti lassàiu sula, cumu na varca senza vila, a testa frasturnata ,l’occhi chini e senza sangu,…. tutti li to vini. Ti lassàiu sula……...partìu luntanu, ma vidu ancòra ca mi stenni a manu mi salutàvi….. ma mi dicevi: torna! t’aspettu cca…...,.cuntu li me jorna. Ora c’haiu furrìatu menzu munnu, e l’haiu vistu quasi ‘nsinu a ‘nfunnu, ora m’arripuosu e pensu sempri a ttia, cu tantu amuri e tanta nostalgìa. E pensu quantu beni mi vulèvi, e quantu cosi belli mi discèvi: “Attentu nun sudàri, annunca t’arrifriddi”, e dusci, dusci, mi mittivi i mani ‘nte capiddi ! M’accarizzavi, mi strincèvi forti, siparàri nni po’, sulu la morti ! La morti ‘mpitiusa poi t’arrubbò, e luntanu, luntanu di mia ti purtò ! Si fisci tardu , passàru li me anni, tra gioi, duluri e peni ranni ! Stancu è u me cori, stanca è la me testa, ma prestu nni ‘ncuntramu e sarà festa !

a cura di Peppe Paino

Data notizia: 9/25/2012